Үөһээ Бүлүү улууһа төрүттэммитэ 88 сылын уонна биллиилээх общественнай-политическай деятель И.Н.Барахов төрөөбүтэ 125 сылын көрсө «Уһулуччулаах дьонноох Үөһээ Бүлүү» диэн оскуола саастаах оҕолорго квест-оонньуу ыытылынна.
6-10 кылаастар кытыннылар.

6 түһүмэхтээх сорудахтары толордулар.

Бастакы түһүмэххэ “Үөһээ Бүлүү бэҕэһээ, бүгүн, сарсын” кинигэттэн “Үөһээ Бүлүү албан ааттаахтара” балаһаттан Руф Иванович Кардашевскай уонна Дмитрий Иванович Донской (Чөрөктүүрэп) тустарынан боппуруостарга эппиэттээһин.

Иккис түһүмэххэ Үөһээ Бүлүүттэн төрүттээх үбүлүөйдээх буойун суруйааччылар балаһаҕа Николай Гаврилович Золоторев- Якутскай уонна Никифор Кирикович Седалищев- Дьүөгэ Ааныстыырап суруйбут айымньыларын булуу.

Үһүс түһүмэххэ библиотека сайтын нөҥүө сорудаҕы толорууга куйаар куод көмөтүнэн холбонон улууспут гиэрбэтин ис хоһоонун билистилэр уонна бириэмэҕэ хомулук хомуйуутун толордулар.

Төрдүс түһүмэххэ Исидор Никифорович Барахов кинигэлэриттэн сорудаҕы толоруу. Исидор Никифорович оҕо сааһын туһунан аахтылар.

Бэһис түһүмэххэ улууспут хаһыатыттан сорудаҕы толорууга хаһыаппыт эрэдээксийэтин аадырыһын уонна электроннай почта аадырыһын хаһыаттан булан суруйууга син өр көрдөөн буллулар, инникитин өйдөрүгэр хатаатылар.

Алтыс түһүмэххэ улууспут каартатын таҥыы буолла. Сургуулуктан Туобуйаҕа дылы улууспут нэһилиэктэрин биир биир уурталаан хайа нэһилиэк төһө иэннээҕин, төһө ыраах сытарын биллилэр.

Бу олус интэриэһинэй түһүмэхтэртэн таҥыллыбыт оонньууга кыттан, улууспут уонна кини чулуу дьонун туһунан элбэҕи биллилэр, кинигэни, хаһыаты кытта хайдах үлэлиири билистилэр.