Кулууп туһунан.
🏠 Бу билигин үлэлээн ньиргитэ олорор кулууппут дьиэтэ ааспыт үйэ бүтүүтэ, сойуус ыһыллыа аҕыйах сыл хаалтын кэннэ 1986с.тохсунньу 25 күнүгэр үөрүүлээх митинг-концерт, ол кэннэ танцы-мансы до утра доҕуһуолунан арыллыбытын оччотооҕу эдэр ыччат дьон бэркэ өйдүүр буолуохтаахтар.
Ол сылларга кулууп директорынан- Петров Сергей Кириллович, методистарынан-Христофорова Валентина Ивановна, Константинова Татьяна Егоровна, худрук- Михайлова Наталья Дмитриевна, библиотекарь- Петрова Наталья Кирилловна, техүлэһит- Тарасова Мария Сергеевна, киномеханик-
Васильев Николай Михайлович – бары биир эйэлээх коллектив буолан түмсэн үлэлээбиттэрэ.
Мэлдьи буоларын курдук концертар, спектакллар, агитзоналар ыккардыларыгар ыытыллар араас культурнай-спортивнай тэрээһиннэр былааннаахтык ыытыллан иһэллэрэ.
Оччолорго дьон кулуупка сылдьар активноһа лаппа үрдүк этэ (видео, компьютер, сотовай телефон өссө кэлэ илик кэмнэрэ буоллаҕа).
Ити кэмҥэ олохтоохтор уопсай мунньахтарынан уураах ылынан, оройуон хаһыата ,,Коммунизм сардаҥата”- нөҥүө ыҥырыы таһааран оройуоҥҥа биир бастакыннан ЗОЖ олохтоох нэһилиэк ахсааныгар киирбит бириэмэбит этэ.
Онон сэбиэт председателя Иванова Анастасия Даниловна быһаччы көҕүлээһининэн кулун тутар 9 күнүгэр кулуупка бастакы арыгыта суох чөл сыбаайбаны тэрийэн ыыппыттара.
Бу бэйэбит олохтоох уолбут Иванов Костя талан ылбыт тапталлааҕын Лидатын кытта дьоллорун-холбуур, кэскиллэрин-тэринэр кэрэ киэһэлэрэ этэ.
Сотору кулуупка саҥа уаз-автоклуб массыына биэрбиттэригэр, суоппарынан айылҕаттан артыыс талааннаах турбут-олорбут эдэр уол Федотов Егор Владимирович үлэҕэ киирбитэ.
Кулуупка бэйэтэ бас билэр массыыналааҕа үлэтигэр хамнаһыгар көмөтө улахан этэ.
Ол курдук сцена активтарын түмэ охсон, мобильнай бригада тэринэн ыраах-чугас нэһилиэктэринэн концертаан кэлэллэригэр табыгастаах буолбута.
Түгэнинэн туһанан сельскэй библиотечнай системаҕа саамай уһуннук 26 сыл (үйэ чиэппэрэ кэм) устата эриэ-дэхси эҥкилэ суох таһаарыылаахтык үлэлээбит киһи Санникова Антонина Романовна буолар.
Кини 2015 сылтан бочуоттаах сынньалаҥҥа тахсан, сиэннэрин көрсөн бөҕө тирэх буолан олорор.
Чэ кулууп үлэтин бастакы сылларыттан кыра-кылгас кэрчик кэми ылан ахтан аастахха, итинник этэ.
С.Дьөгүөрэп.
