Өрөспүүбүлүкэтээҕи “Кыайыы Знамята” эстафета бу сыл тохсунньу 9 күнүттэн Мэҥэ Хаҥалас улууһуттан саҕаламмыта. Олунньу 19 күнүгэр, Улуу Кыайыы 80 сылыгар аналлаах «Кыайыы Знамята» Дүллүкү нэһилиэгэр көрсүү үөрүүлээх түгэнэ буолла. Улуу Кыайыы бэлиэтин – Кыайыы Знамятын Аҕа баһылыкпытыгар Николай Петрович Романовка, Үөһээ Бүлүү сэлиэнньэтин баһылыгын солбуйааччы Егор Владимирович Михайлов туттарда. “Кыайыы Знамятын” ытыктаан, дойдубут өрөгөй ырыаларын сүһүөхпүтүгэр туран көрүстүбүт. Тэрээһин үөрүүлээх чааһын нэһилиэкпит баһылыга Николай Петрович Романов тыл этэн арыйда. Кыыһар Кыайыы дуоҕатын Анал байыаннай дьайыы бэтэрээнэ Михаил Васильевич Ан, улуус бэтэрээннэрин сэбиэтин бэрэссэдээтэлэ Иван Егорович Чычахов, ыччат уонна дьиэ кэргэн отделын салайааччыта Зоя Моисеевна Колосова уонна 3 полиция сотрудниктара арыаллаан аҕаллылар. Нэһилиэкпититтэн эҕэрдэ тылы эттэ анал байыаннай дьайыы кыттыылааҕа, ветерана Перевалов В.

Дүллүкү нэһилиэгиттэн 1941- 1945 сс. Аҕа дойду Улуу сэриитигэр- 252 киһи ыҥырыллыбыта. Олор истэригэр сэрии толоонуттан эргиллибэтэхтэр уонна сураҕа суох сүппүттэр- 124 киһи, Сэбиэскэй Аармыйа кэккэтигэр сулууспалаабыттар- 36 киһи, үлэ фронугар сылдьыбыттар- 36 киһи, сэрииттэн эргиллибиттэр- 56 киһи.
Ким да умнуллубат, туох да умнуллубат!
Ытык дьоммут хорсун-хоодуот быһыыларыгар сүгүрүйэбит, өйдүүбүт уонна дойдубут чэчирии сайдарын туһугар бары кыһамньыбытын уурабыт.
“Кыайыы Знамята” салҕыы Хоро нэһилиэгэр Кыайыыны уруйдуу айаннаата.