Муус устар 26 күнүгэр Өрөспүүбүлүкэбит күнүн көрсө библиотекабытыгар, күн бастакы аҥарыгар 3 кылаас үөрэнээччилэригэр Саха Өрөспүүбүлүкэтин төрүттээбит чулуу уолаттарбыт туһунан медиаурок көрдөрүүтэ уонна Өрөспүүбүлүкэ үрдүнэн ыытыллар “Символы Якутии” олимпиада ыытылынна.

Күн иккис аҥарыгар Дүллүкүтээҕи Сынньалаҥ Киин уонна Дүллүкү нэһилиэгин Библиотеката кыттыһан, Саха Өрөспүүбүлүкэтин күнүгэр аналлаах түөлбэлэр икки ардыларыгар “МИН ДОЙДУМ” түһүмэхтэринэн-айан (квест-игра) оонньууну ыытта.
Бэрт сэргэх оонньууга, нэһилиэкпит депутаттарынан ылыныллыбыт, Дүллүкү үс түөлбэтиттэн биирдии хамаанда кэлэн кытыннылар.
Хас биирдии хамаанда (“Илин”, “Ортоку”, “Арҕаа” түөлбэлэр) үс киһиттэн турар: биир улахан киһи уонна икки үрдүкү кылаас үөрэнээччилэрэ буоланнар оонньууга кыттыһан, түһүмэхтэринэн (нэһилиэк тэрилтэлэринэн) баран оонньуу саҕаланна.
Кыттааччылар, хас түһүмэх ахсын, бэрт судургу эрээри, олус үчүгэй сорудахтары толордулар…
Арассыыйаҕа “Дьиэ кэргэн”, Саха Сиригэр “Оҕо саас”, Үөһээ Бүлүүгэ “Түмсүү” сылларынан, өссө биир сэргэх тэрээһин, биһиги нэһилиэк инникитин даҕаны түмсүүлээх буолуоҕун кэрэһэлиир.
Саха Сирэ биир сүрүн государственнай бырааһынньыгын – Республика Күнүн бэлиэтии саҕаламмыт тэрээһин сүргэни көтөхтө.

Айан оонньуу түмүгэр кыайыылааҕынан таҕыстылар “Арҕаа” түөлбэ, иккис миэстэни “Ортоку” түөлбэ, үһүс бочуоттаах миэстэҕэ “Илин” түөлбэ тигистэ. Күрэхтэһээччилэр сэмэй бэлэхтэри уонна мэтээллэри туттулар.

Түмүктүүр тэрээһин “Дьоҕус пааркабытыгар” дьон тоҕуоруһа мустан Өрөспүүбүлүкэбит күнүн бэлиэтии улуу убайдарбытыгар сүгүрүйэрбитин биллэрэн митинг ыытылынна. Нэһилиэк баһылыга Романов Н.П. тыл эттэ, Саха сирин былааҕын күөрэттэ. Салҕыы сахабыт үҥкүүтүн оройуттан туттубут. Оһуохайы таһаардылар Саския Васильева Дүллүкү орто оскуолатын 8 кылааһын үөрэнээччитэ уонна Егорова Н.В. Дүллүкү орто оскуолатын муусукаҕа учуутала.