Далыр 29.05.1960 сыл. Биһиги сарсын онустарга экзамен буоларыгар ньургуһун хомуйа Хара Таалаҕа барыахтаахпыт: Саня Егорова, Маня Хогурова, Мавра Федорова, Вера Оконосова, Роза Николаева, Анна Алексеева, Мила Докторова (бу Мила дневнигиттэн ыллым).

Дьэ, биһиги ити бочуоттаах сорудаҕы толороору интернат биэрбит киирсэбэй саппыкытын дэлби баахсалаан, формабытын өтүүктээн, ол саҕана муода лакированнай курунан быакаччы курданан, суһуохпутун икки аҥы өрүнэн киэргэннибит. Кырааска сыстыбатах айылҕа биэрбит кэрэ сэбэрэбитинэн этибит. Техника тэпсибэтэх Далырбыт көҕөрөн эрэр күөх хонуутунан сааскы сайаҕас салгынынан тыынан, үөрэн- көтөн чэпчэки- чэпчэкитик үктэнэн Хара Таалабытыгар кэтиллэ түстүбүт, дьэ, доҕоор халдьаайыбыт сөмүйэ баттыыр сирэ суох ньургуһун бөҕөтө үүммүт, мин төрөөн көрбөтөх элбэх сибэкким, айылҕам имнэннэҕэ дуу, хараҕым саҥалыы көрбүт курдуга, ити иһин икки атах ньургуһун туһунан хоһоон, ырыа айан тапталларын туойдахтара, биһиги кылаас уолаттара уора- көстө таптал туһунан суруйдахтара. Кэрэ кыргыттарбыт айар талааннара арылларыгар сылтах, төрүөт буоллахтара дии, биһиги кылаастан Александр Архипов, Василий Титов, Николай Герасимов- Айталын биллиилээх суруйааччы, суруналыыс буолбуттара.

Мария Докторова- Хогурова, Дүллүкү нэһилиэгин бочуоттаах олохтооҕо, сэрии сылын оҕото, үлэ ветерана.

Ирина Томская хаартыскаҕа түһэриилэрэ.