Тэрээһиммит саҕаланыыта норуодунай бэйиэт туһунан кэпсэтииттэн саҕаланна, Намҥа баар түмэл саҥалыы бэлэмнэммитин билиһиннэрдибит, “Тобуруокап ыллыга” хайдах курдук тупсаҕайдык оҥоһуллубутун кэпсээтибит, түгэн көһүннэҕинэ түмэлгэ сылдьалларыгар сүбэлээтибит.
“Күндүттэн күндүнү – олоҕу туойбутум”
диэн ааттаах ТОК-оонньуу (Толкуйдаа Оонньоо Кыай.) кыра кылаастан саҕалаан сөбүлээн ааҕар, үөрэтэр айымньыларбыт ааптара Петр Николаевич Тобуруокап үбүлүөйдээх сылыгар анаан оскуолаҕа ыытылынна. Кылаас аайыттан иккилии оҕо кытынна. 2 хамаандаҕа арахсан оонньуубут саҕаланна.
1-кы түһүмэххэ суруйааччы олоҕуттан ыйытыылар бэрилиннилэр.
2-с түһүмэххэ Тобуруокап суруйбут айымньыларыттан сүрүн геройдары быһыыларын-майгыларын ойуулааһынынан таайбараҥ.
3-с “Тылбаас” түһүмэх отой интэриэһинэйдик ааста. Суруйааччы оскуола туһунан хоһоонун нууччалыы тылбаастаан, онтон дьүүллүүр бөлөххө доргуччу ааҕан иһитиннэрдилэр.
4-с түһүмэх “Түөрт строка”. “Тобуруокап көмүс күһүнэ” өрөспүүбүлүкэтээҕи тэрээһиҥҥэ үгэс буолбут күрэҕи киллэрэн биэрдибит. Бу түһүмэххэ хамаандалар оскуола туһунан түөрт строкалаах хоһоон айдылар.
5-с түһүмэх – “Саспыт тыллар”. Бу түһүмэххэ “Тобуруокап” диэн тылтан ким элбэх тыл таһаарар эбит диэн куоталастылар. Саамай элбэх тылы “Тобуруокаптар” хамаандалара таһаарда.
6-с – Таайтарыылаах успуорт”. Манна таабырын таайтардыбыт. Онно 4 саха успуордун көрүҥэ баара: сүүрүү, хапсаҕай, мас тардыһыы, кылыы. Оҕолор бэриллибит таабырыннары, боппуруостары, кроссвордары умсугуйан туран таайдылар. Онтон бүтэһик 7-с түһүмэххэ көрдөөх “Мас тардыһыыта” буолла. Илиилэрин холбоон баран икки сөмүйэлэринэн испиискэни тутан баран тардаллар.
Оонньуу түмүгүнэн кыайыылаах хамаанда “Тобуруокаптар” буоллулар, оттон “Буукубалар” аҕыйах балынан хаалан кыайтаран кээстилэр . Бу күнү олус интэриэһинэйдик уонна туһалаахтык атаардыбыт- диэн оҕолор санааларын үллэһиннилэр. П.Н.Тобуруокап олоҕун, айымньыларын туһунан билиибитин тургуттубут, эбии элбэҕи биллибит. Сынньалаҥҥытыгар ТОБУРУОКАП диэн тылтан саспыт тыллары булан атаарыҥ диэн сүбэлиибит, элбэх да уһун да сахалыы тыллар тахсалларын сөхтүбүт.
Тэрээһин түгэннэриттэн хаартыскалар.
