Үтүө күнүнэн!

Бука барыгытын эҕэрдэлээн уонна кинигэ ааптарыгар Анатолий Макарович Федоровка – Дулуга, ону тэҥэ бу кинигэ тахсыытыгар сыраларын ууран туран үлэлэспит дьоммутугар, чуолаан:

Нэһилиэкпит баһылыгар Егор Алексеевич Николаевка,

Ветеран учууталларга Федоров Анатолий Макаровичка,Саввинова Людмила Никитичнаҕа, Васильева Валерия Васильевнаҕа уонна олохтоох дьаһалта сүрүннүүр специалиһыгар Ильина Нина Николаевнаҕа махтанан туран, “Төрүт дойдум – Дүллүкүм” диэн дьоһуннаах кинигэ иккис чааһын биһирэмин тула кэпсэтии истиҥник буолла. Биһирэм аныгы кэм сиэринэн куйаар ситимин нөҥүө тэрийэн ыытылынна, ыраахтан- чугастан биир дойдулаахтарбыт үөрүүбүтүн үллэһиннилэр.

Чахчы да уурбут-туппут курдук, олус кичэллээхтик суруллан, таҥыллан, халыҥ истэнэн, кытаанах тастанан, астык көрүҥнэнэн тахсыбыт кинигэнэн биһиги – Дүллүкүлэр киэн туттуох тустаахпыт.

   Кинигэ “Туругур, үйэ-саас Дүллүкүм!” диэн Акулина Дмитриевна Христофорова тылларыгар, Эдуард Гаврильевич Чоросов матыыбыгар суруллубут Дүллүкүбүт өрөгөй ырыатынан уонна Дүллүкү нэһилиэгин баһылыга Егор Алексеевич Николаев аан тыл суругунан саҕаланара ордук суолталаах, алгыстаах буолбут.

Кинигэ биһирэмигэр кыттыыны ылбыт дьоммут махтал тылларын, астык хайҕабылларын, санааларын иһиттибит.

Кэлбит ыалдьыттарбыт илии тутуурдаах, өттүк харалаах астынан тарҕастылар.

  Төрөөн-үөскээн улааппыт, ону таһынан үгүс киһи кэлэн таптаан олохсуйбут Дүллүкүбүт хайдах төрүттэммитин, кэрдиис кэмнэри тиһэр баай историятын, ааттаах-суоллаах дьоһун дьонун туһунан суруйуулары, ахтыылары бу кинигэттэн ааҕыахпыт.

“Төрүт дойдум – Дүллүкүм!” кинигэ үгүс ааҕааччыланан, дойдубут киэн туттар дьоно-сэргэтэ, баай историята уостан түспэт номох буолан, үүнэр саҥаттан-саҥа көлүөнэҕэ күндү бэлэх, сирдьит сулус буолуо уонна төрөөбүт төрүт дойдуга күүстээх тапталы, бэриниилээх буолууну иҥэриэ диэн бигэтик эрэнэбит.

Субу курдук сомоҕолоһон түмсүүлээх буоллахпытына, Дүллүкүбүт өрүү үүнэ-чэчирии, сайда-туругура туруо! Дьоллоох буолуҥ!!!