Болҕой боппуруос: Оройуоҥҥа нэһилиэктэринэн самодеятельноһы көрүү конкурсугар Дүллүкүлэр “Ньургун Боотур” драманы туруоран мэлдьи бастакы миэстэни ылаллар, Никиитэ ким оруолун олус үчүгэйдик толорбутай?
Олоҥхоһут Никита Семенович Александров- Ынта Никиитэ.
Үөһээ Бүлүү биир биллэр олоҥхоһутунан биллэр. Ол кини “Көр Буурай бухатыыр” олоҥхотун икки төгүллээн, 1925 с. уонна 1941 с. суруйбуттарыттан даҕаны, олоҕун тиһэх сылларыгар уус- уран самодеятельноска олоҥхону туруорууга кыттыбытыттан даҕаны, дьоно- сэргэтэ үчүгэй олоҥхоһут быһыытынан ахтан- санаан да ыларыттан көстөр.
“Көр Буурай бухатыыр” олоҥхо хоһоонунан суруллубут, уопсайа 13 тыһ. тахса хоһоон строката баар, ол аата ортону үрдүнэн кээмэйдээх олоҥхо. Бу олоҥхо сюжета атын олоҥхолортон улахан уратыта суох. Бу олоҥхоҕо мифологическай персонажтар киин улуустар олоҥхолорун курдук соччо- бачча көстүбэттэр. Ол да буоллар Көр Буурай айыы сириттэн аттанарыгар сир- дойду иччилэрин ааттаан туран алгыс этэр, Айыыһыттар, Иэйэхситтэр, Дьөһөгөй, уот иччитэ Хатан Тэмиэрийэ ааттарын ахтар. Алгыһыгар айыы бухатыыра үчүгэйдик сылдьыах буоллаҕына, күөоэгэй чыычаах кэлэн ыллаан- туойан ааһыа, куһаҕаннык сылдьыах буоллаҕына киргил кыыл кэлэн кэпсээн ааһыа диэн бити- билгэни этэр. Саха өйдөбүлүгэр, киргил өлүү- сүтүү бэлиэтэ буолар, дьиэ таһыгар киргил кэлэн тоҥсуйарын улаханнык аньыырҕыыллара. Бу матыып Ынта Никиитэ олоҥхотугар киирбитэ кэрэхсэбиллээх. Олоҥхо түмүгэ судургу. Көр Буурай сырыытын- айанын уустаан- ураннаан хоһуйуунан түмүктэнэр.
Сэрии кэнниттэн оройуоҥҥа нэһилиэктэринэн самодеятельноһы көрүү конкурса ыытыллар эбит. Дүллүкүлэр “Ньургун Боотур” драманы туруоран мэлдьи бастыыллар эбит. Никиитэ онно абааһы уола Уот Уһутаакы оруолун олус үчүгэйдик толороро. Тылын нойосуус үөрэтэн эрэйдэммэт, биирдэ аахтаран истэн баран туох да иҥнигэһэ суох оруолун толорор дииллэр. Оруолун үчүгэйдик толороругар олоҥхоһут идэлээҕэ туһалаабыта чуолкай. 1957 сыллаахха оройуоннай фестивальга Дүллүкүлэр П.А. Ойуунускай “Кыһыл ойууну” туруоралларыгар Никиитэ кырдьан, кыаммат буолан кыайан кыттыбатаҕа.
