Тохсунньу 28 күнүгэр нэһилиэк библиотекатыгар, 60-70сс Үөһээ Бүлүү улууһун уус-уран самодеятельноһын, культура ветерана, сахалыы көр-күлүү жанрын тарҕатааччы, активист, ырыаһыт, артыыс, көрдөөх кэпсээнньит, биллэрээччи, тамада, спортсмен, булчут, өр кэмнэргэ культура дьиэтин салайааччытынан үрдүк таһаарыылаахтык үлэлээбит
Петров Кирилл Сергеевич төрөөбүтэ 90 сылын бэлиэтээн “ҮӨРҮҮНҮ ТЫЛЛААН, ҮЧҮГЭЙИ ЫРАЛААН” диэн, бииргэ үлэлээбит, алтыспыт дьоно- сэргэтэ, оҕолоро ахтыы киэһэтин бэрт сэргэхтик тэрийэн ыыттылар.
Кирилл Сергеевич 1935 сыл тохсунньу 9 күнүгэр Дүллүкүгэ холкуостаах ыалга иккис оҕонон төрөөбүтэ. Дьокуускайдааҕы култуурунай учуулуссаны бүтэрэн баран,хоту Эдьигээн Кыстатыамынан, соҕуруу Ленскэйинэн кулууп дириэктэрдээн баран, Далырга, онтон Дүллүкүгэ ТКДь-н дириэктэринэн бэрт таһаарыылаахтык үлэлээбитэ.Бэйэтэ көрдөөх ырыалары толорооччу быһыытынан өрөспүүбүлүкэ үгүс улуустарын кэрийбитэ, улахан куонкурустарга бастыҥ ааты элбэхтик ылбыта. Атаҕынан кыанара, үөрэнэ сылдьан сылааламҥа өрөспүүбүлүкэҕэ миэстэлэһэрэ. Партийнай тэрилтэ идеологияҕа сиэктэригэр сэкиритээрдээбитэ.
Кирилл Сергеевич бэрт кэпсэллээх киһи этэ, элбэх ааҕыыларга кыттыбыта, көрдөөх кэпсээнэ элбэх буолааччы, биири ахтан ааһыахха: “Үөрэхтэн борохуотунан иһэн, Бүлүү өрүһүгэр киирээт, дойдубар кэлбит киһи курдук сананан, ыллаан ыыра бардым уонна улаханы кыайбыт- хоппут киһи буолан ырыабын түмүктээтим. Арай аттыбар палубаҕа биир эмээхсин ытаан барбытыгар: “Тоҕо ытаатыҥ?” диэн туоһуласпыппар, киһим “Ээ, былырыын саас ыран өлөрүгэр биир борооскум ити эн ырыаҥ курдук саҥа таһааран өлөөхтөөбүтэ”-, диэн соһутта”, Бу киэһээ, онтон да атын бэрт көрүдьүөс түгэннэр ахтыллан, ол саҕанааҕы үлэ кэмнэрэ, гастролга сылдьыы түгэннэрэ субу баардыы харахха, өйгө- санааҕа көстөн кэллэ.
Инники былааҥҥа, өр кэмҥэ култуура эйгэтигэр таһаарыылаахтык үлэлээбитин сыаналаан Дүллүкү нэһилиэгин сынньалаҥ киинигэр Кирилл Сергеевич Петров аатын иҥэрэллэрэ буоллар диэн баҕа санаалаахпыт.
Бииргэ үлэлээн, алтыһан ааспыт дьоммутугар, бу киэһэҕэ кэлэн күндү ыалдьыт буолбуккутугар махтанабыт, чэгиэн сылдьыҥ диэн алҕыыбыт!
