ДЮЛЛЮКИНСКАЯ МОДЕЛЬНАЯ СЕЛЬСКАЯ БИБЛИОТЕКА

“Хара кыталык” роман- трилогияҕа Дүллүкү сирэ- уота

Гоголев Иван Михайлович- Кындыл төрөөбүтэ 95 сылын бэлиэтии Дүллүкү орто оскуолатын үрдүкү кылааһын оҕолоругар “Үтүө дьон туһунан кэпсиибин” библиотечнай уруок ыытылынна. Уруокка саха тылын уонна литературатын учуутала Антонина Ивановна Афанасьева, Иван Гоголев оҕо сааһын, олоҕун, үлэтин туһунан кэпсээтэ. Чахчы да, дэгиттэр талааннаах суруйааччы, драматург, хоһоонньут айымньыларын, олоҕун туһунан элбэҕи биллилэр.

Уруокпут иккис чааһыгар Николай Васильев- Харыйалаах Уола, биир дойдулаахпыт “Саха сирин литератора” ассоциация чилиэнэ Владимир Тимофеевич Николаев туһунан ахтан, кини үлэтин туһунан сырдатта. Тоҕо бу, Владимир Николаевы Иван Гоголев- Кындылы кытта ахталларый? диир буоллаххытына- уһун кэмҥэ Владимир Кындылы кытта бииргэ үлэлээн-хамсаан алтыһан сылдьыбыт уонна чугас үөлээннээҕэ эбит. Ол курдук Владимир суруйаччы, суруналыыс, тылбаасчыт идэлээҕэ. Анаабырга хаһыат үлэһитинэн ананан үлэлии сылдьар кэмнэригэр сахалыы айымньылары нууччалыы тылбаастыы үөрэммит. “Дьулуруйар Ньургун Боотур” олоҥхо подстрочнай тылбааһын саҕалаабыт, кэлин ону нуучча бэйиэтигэр В. Державиҥҥа биэрэн тылбаастаппыттар. Хас да айымньыны тылбаастаабытыттан биирдэстэрэ Иван Гоголев- Кындыл суруйуутугар “Хара кыталык” роман- трилогия буолар. Бу ромаҥҥа, дьон кэпсииринэн, Дүллүкү сиригэр- уотугар, Хабырыыстаах Хобороос олохсуйа сылдьыбыттара ойууланара саарбаҕа суох. Этэрбэс икки Арҕаа Бэттиэмэ икки ардыларыгар Бүөр алаас баара диэн сабаҕалыыллар, киһи уҥуохтарын тааһыгар аахтахха Гаврил диэн сурук дьэҥкэтик көстөрө.

Ол да курук тылбаасчыт быһыытынан Владимир Николаев, Амма Аччыгыйа “Сааскы кэм”, Софрон Данилов “Сүрэх тэбэрин тухары”, Далан “Тыгын Дархан” арамааннара кини илиитин иһинэн ааспыттарын билэбит. Верхоянскайга өр кэмҥэ эрэдээктэринэн үлэлии сылдьыбыт.

Николаев Владимир Тимофеевич

Владимир Николаев хоһоонноро Күрүлгэн 2024 сыл 5 нүөмэригэр бэчээттэммитэ. Дьоҥҥо- сэргэҕэ ситэ- хото биллибэккэ хаалбыт улахан тылбаасчыппыт, хомоҕой хоһоонньуппут, кэрэхсэбиллээх кэпсээнньиппит туһунан сиһилии үөрэтэр баҕалаахпыт, бэчээттэммэтэх суруйууларынан кинигэ таһааттарар былааннаахпыт.