Үтүө дьон туһунан кэпсиибин
Бүгүн үрдүкү кылаас үөрэнээччилэригэр “Үтүө дьон туһунан кэпсиибин…” диэн библиотечнай уруок ыытылынна. Бу тэрээһин СӨ бэчээтин, култууратын туйгуна, суруналыыс Иван Васильевич Борисов үбүлүөйдээх 85 сааһыгар анаан ыытылынна.
Учууталбыт А.И.Афанасьева суруналыыс кыһалҕалаах оҕо сааһын, умсулҕаннаах айар үлэтин туһунан кэпсээтэ. Оҕолор Иван Васильевич идэтин хайдах талбытын, дьулуурдаахтык үлэлээбитин туһунан сэргээн иһиттибит. Кини олоҕор муспут баайа – билии, кинигэ, буоларын билэн сөхтүбүт.
Салгыы библиотекарь Я.О.Борисова Иван Васильевич араас сылларга Дүллүкү ааҕааччыларыгар бэлэхтээбит кинигэлэрин быыстапкаҕа туруорбутун билиһиннэрдэ. Манна нэһилиэкпититтэн Аҕа дойду Улуу сэриитигэр хорсуннук кыттыбыт ытык дьоммут туһунан уонна үтүө үлэһит дьоммут туһунан кинигэлэрин көрдүбүт. Суруналыыс Иван Васильевич тус үлэтин таһынан олоҕор көрсүбүт, билсибит үтүө дьонун туһунан кинигэҕэ үйэтитэн дьон билиитигэр таһаарар эбит диэн өйдөөтүбүт.
Оттон мин оскуола медиастудиятын корреспондена буоларым быһыытынан, оҕолортон интервью ылан, суруналыыстыка биир жанрын билиһиннэрдим.
Уруоктан биир дойдулаахпыт, республикаҕа киэҥник биллэр суруналыыс, билигин Дьокуускай куоракка айа-тута олорор И.В.Борисов туһунан элбэҕи билэн-көрөн кэллибит.

Алина Санникова, 10 кылаас, Дүллүкү, Үөһээ Бүлүү