Үрүҥ күнү солбуйа,
Улам им сүтүүтэ,
Сандаархай өҥүнэн
Сыдьаайан кэлэриҥ.

Хараҥа халлааммар
Соҕотох көмүс киэргэлим.
Эн эрэ буолаҕын ыйым,
Мин түүҥҥү доҕорум.

Ардыгар хара былыттар
Сабардыырга дылылар.
Сэдэх көстүүлээх буолаҥҥын,
Күн ахсын көрсүбэт буоларбыт.

Ол эрэн кэрэ түгэни
Мүччү туппатарбын,
Эйигин атаспын,
Көрсөрбүн күүтэрим…

Истиэҥ буолаарай,
Талаһар санаабын…
Мин бу орто дойдуга
Хайдах олорорбун.

Олох ыркый ойууругар,
Өрүү аргыс буолан,
Сирдээ дуу миэхэ,
Сөптөөх ыллыгы туһаайан.

Эн тула сулустар элбэхтэр,
Эрээри соҕотохсуйаҕын…
Мин тула дьон эмиэ үгүс,
Ол эрэн син биир чуҥкуйабын.

Төһө киһи эн тускунан
Ырыатыгар ыллаата?
Төһө айар куттаах
Хоһоонугар хоһуйда…

Мин эмиэ сатаабаппын да буоллар,
Хомоҕой хоһооммор ыпсаран,
Айылҕам тапталын хоһуйан
Сэмээр кэпсээн эрдэҕим…

Түүнүн утуйбат уулаах буоламмын,
Өрүү халлааны эрэ одуулуубун…
Соҕотох көнньүөрэн көрөрбүн
Оҕо эрдэхпиттэн таптыыбын.

Ааспыты эргитэ саныырым,
Кырыа оһуордаах түннүк нөҥүө
Түүҥҥү айылҕаны кууһарбын,
Ону билигин, бу хоһуйабын…

Көҥүлү көрдүүр санааларым,
Олохпор дьиҥ толкуйдарым,
Барыта айылҕам туһугар,
Бүгүн түүн, ыйым абылаҥар…

Эдуард Чоросов-Айылгы Тыына

Үөһээ Бүлүү, Дүллүкү.