Үөһээ Бүлүү улууһугар бу дьыл сэтинньи 6 күнүгэр төрөөбүт иҋэ тылбыт хараанньыта, сахалыы саҥабыт эмчитэ, лиҥкибиис-учуонай, саха саарына Мэхээлэ Бөтүрүөбүс Өлөксүөйэп-Дапсы төрөөбүт күнэ –  «БИҺИРЭМ ТЫЛ күнүнэн» бэлиэтэнэр. Төрөөбүт тылбытын өрүтүннэрэр сыаллаах, сахалыы саҥарар, сахалыы толкуйдуур ыччаттары иитэн таһаарар сөптөөх үлэни-хамнаһы өрө тутуохха!

Сэтинньи 7 күнүгэр «Биһирэм тыл күнүн» иитинэн үһүс төгүлүн «Дапсы дьыктаана» аахсыйа ыытылынна. Быйыл кэлэр кэнэҕэски ыччаттарбыт суруйалларын ситистибит. Ол курдук, бэһис кылаастан үөһээ үөрэнээччилэр Дапсы дьыктаанын саха тылын уруогар суруйдулар.

Быйылгы дьыктаан тиэкиһэ Былатыан Ойуунускай төрөөбүтэ 130 сылын бэлиэтии, “Оҕо куйуурдуу турара” айымньытын суруйдулар.

Дапсы дьыктаанын тэрийсиитигэр көмөлөспүт учууталларбытыгар барҕа махтал тылларын ыытабыт.