Ахсынньы 6-7 күннэрэ Дүллүкү нэһилиэгэр, Үлэ бэтэрээнэ, Үөһээ Бүлүү улууһун, Дүллүкү уонна Кырыкый Бочуоттаах олохтооҕо, хапсаҕайдаһан тустууга САССР спордун маастара, Манчаары оонньууларын бастакы спартакиадатын чөмпүйүөнэ, Саха өрөспүүбүлүкэтин “Гражданскай килбиэн” хаһаайына, общественнай журналист, мемуарист, спортивнай комментатор, амарах аҕа, эйэҕэс эһэ Константин Иванович Мандаров сырдык аатыгар хапсаҕайдаһан тустууга түөрт нэһилиэк Кырыкый, Маҥаас, Далыр уонна Дүллүкү холбоһуктаах күрэхтэрэ бүгүн иккис күнэ саҕаланна. Күрэх кылаабынай судьуйата Увар Егорович Тимофеев. А.И. Устинов аатынан Дүллүкүтээҕи успуорт саалатыгар сарсыарда 11:00 чаастан үөрүүлээх арыллыыта буолла. Күрэх арыллыытыгар кыттыыны ыллылар улуус баһылыгын социальнай эйгэҕэ уонна дьиэ кэргэн бэлиитикэтигэр солбуйааччы Анна Михайловна Уларова, успуорт управлениетын начальнига Егор Алексеевич Николаев уонна Кырыкый нэһилиэгин баһылыга Сергей Яковлевич Сергеев, Маҥаас нэһилиэгин баһылыга Николай Григорьевич Илларионов, Далыр нэһилиэгин баһылыга Георгий Егорович Иванов, Дүллүкү нэһилиэгин баһылыга Николай Петрович Романов, Константин Иванович Мандаров бииргэ төрөөбүт быраата Валерий Иванович Мандаров уонна оҕолоро, хос сиэннэрэ.

Бүгүҥҥү күрэххэ барыта 56 кыттааччы, олор истэригэр Ньурба, Бүлүү уонна Мииринэй куораттан тиийэ кэлбиттэр.

Мантан киэһээ хабыр хапсыһыылар, кыраһыабай быраҕыылар буолаллара саарбаҕа суох. Бу күн, ким муҥутуур кыайыылаах аатын сүгэр эбитий, хапсаҕайы сөбүлээн көрөөччүлэр тустуук уолаттарбытыгар күүстэригэр күүс эбэн, кыайыыга кынаттыы, өйөбүл буола кэлэргитин күүтэбит.